Yermo y labios

Bi ha deseyo de carne acuosa,
gotas de labios mullando orizons.
Deseyo de sols royos de nuei.
Bi ha deseyo de caminar sin chepas
lichers como l'aire tobo,
alcaso sin piez,
sobre una piel eterna.
No bi ha nuei sin d'aurora
dimpués d'a nuei conoxida.
Os polius paxaros d'ibierno s'amagan
en selbas amorosas. Crema la bida
buscando la gran tenalla primaberal,
do s'escorre l'augua creyatiba.
Y en plegar a o país de l'alba
s'aturan os secsos. Bi ha una casa
en a muga d'o zerclo d'o tiempo.
Bueda, abitable. Un alba inmediata.
Silenziosa. Os bestius femeninos
s'implen ya d'olors de mai.
Bi ha mans de fuertes benas estendidas
enta la color d'a bida.
Plebe por as carreras de l'amor.
Bi ha puntos d'estrelas en os labios,
tremolar de gotas en fuellas de yermo,
amorosiaus peitos blancos.

Chuan Chusé Bielsa