Esprito

Cuan se siente l'Aire en silenzio
Querérbanos marchar en Él
Espullatos
(En as zeldas d'o mundo
En as falsas d'o mundo
Sofla l'aire y canta
Entre bueitas asperas disiertas)
Dizir as cosas con l'aire
Dixar-lo tot puyar con l'Aire
¡Ye o biache de toda tierra
Enta l'orichen d'os Zierzos!

¿Dó ba l'Aire con a suya priesa aimata
Con a suya musica funda y antiga?
Truquetía en as finestras de as falsas
De l'anima
Debanta freaticas ferbors amagatas
Ubre cambras grans como paradisos estrelatos
Con estensions do chuga o misterio entre penumbras
Fa naxer planetas biellos emparando lo silenzio
Como perditos globos terraquios sin de luz
Plenos d'infanzia y sin de mugas
(Tan sólo mons y auguas en unidá d'esfera)

¡Ai, a escureldá luminosa de as zeldas
A coloriata machia fosca de as falsas!
Aire, aire que corre en libertá
Aire cantando en lo infinito de l'ausenzia
Tobamén
(¡Qué dulzas as oras en l'albandono
A lo ausolutamén intimo!)

Sentir-se morir en o país de as falsas
En o país de as zeldas umbrosas
En o país de lo supremamén útil
Sentir-se morir y en ese inte
Dispertar con un rayo de luz que baxa
Dende o teito altismo de a nuei
(¿Sientes as alas de os paxaros esbellugar-sen
En os pobres niedos d'archila y palletas?)
Dispertar dende a paradoxa de a miseria
Dispertar de no tener cosa entre os didos
Dispertar por no tener cosa y en a casa
Que dengún no quiere ni besita
(Libros que dengún no leye en a pesata y biella arca
De os tresoros
Gambetos que dengún ya no se mete ta bibir
Sobre o paisache grisenco de os ibiernos
Chuguetes con as suyas colors pansitas
U con risos ubrindo-sen baxo tararainas
Cusitas entre o polbo
Mesas que solamén o poeta prefiere
Mesas que dan bersos
De a color de as tardadas amorosiatas
En soledá
Y finestras alteras y chiquetas como lucanas
Con rugas impresas en añadas amarillas
Que dengún no poderba remerar
Finestras ta Beyer más que ta beyer)

Aire, aire, sofla en o tuyo buelo unitario
Sobre todas as zeldas d'o mundo
Sobre as falsas que abitan poetas y monches y ninos
Y tamién sobre toz os ombres
Amuestra espullata la tuya canta de zielo y altaria
Abía-nos entre sonius de polida claredá
Enta la tuya Casa
A os perditos
A os que creyemos nuestra cualque luz
A os que encara no tenemos a umildá
De l'amagata belleza de a tuya boz

    Chuan Chusé Bielsa