U l u r u   (Ayers Rock)

Prosa poetica

En o inizio d'as nueis, cuan o sol ye blanco-negro en o esmo, perén canta en a floresta d'o rabal (a o costau d'a cambra de yo) lo paxaro que suenia. Bi ha encara brancas bibas y flors y gratuidá. Alabez sólo ye reyal ixa canta... Puede pasar l'aire sobatendo as tellas d'a casa _cuasi_ albandonata. Pueden ricuerdos lexanos en as carreras secas _como fuellas_ tornar improbisatamén debuxando mans, trucando puertas. Puede que en o reutanglo d'os días, en as cambras esternas d'a bida brilen luzes que no son que estapenzias... ¡Ixo rai! Agora se siente esclusiba la canta que suenia, a gola funda d'un paxaro d'edaz, dillá d'a dualidá que secutió los templos como fuesas profanatas.

A canta d'as nueis diz: "Bende os trofeyos sensitibos d'a conzienzia, bende os suenios obligatamén bibitos, bende os días que talloron en siñals allenos; en astrals de yerba trobarás l'aduya d'esistenzia, estronca razons eszesibas, dalla la tuya cullita de foscors, desfá en a mesa d'o sacrifizio as parolas rituals que tornoron en sangre os sons de dios y d'a nineza. Bi ha simiens d'una zerteza: baxo napas amariellas d'agüerro ye amán a tuya primabera. Ó, biene, torna, os mons y os güellos sin de midas, como Ulurus por adorar en a inoranzia, t'asperan en renunzias paradoxicas, as pisadas d'a nuei ya marchan con tu enta l'amanixer que aculle o día. A l'inte... a l'inte soi can, soi fuego en espelungas primichenias, a l'inte soi a reyalidá d'as fadas blancas, a l'inte plebidas en un zielo ecuatorial; soi l'aire que asume o buelo d'o esprito d'o suenio." A canta diz parolas d'alba, a canta ye bonica como un cuerpo que no tocaré, a canta no muere con o paso d'os beranos, a canta fa esclatar o tiempo y fa ondas d'uniberso que no chuzgan. A canta arrigue, quererba dar muesos a la polideza.

"Ascuita. A tierra que pisas crebazata, plena de camins como cullebras en o güembro de güeso, estió bandiando una mar azul que ye bullindo encara en o silenzio. Siente. Bi eba olas que con as suyas bocas amorosiaban delfins boladors de superfizies, bi eba azuls que dengún no güellaba, porque as bestias bibiban ya entre azuls, s'afogaban as canseras sobre abismos-laboratorios zelestes. Siente. No sólo bi eba mars. Atros Ulurus debantaban o rostro polidismo. Ulurus de flors acuosas, de palmas laminando as plachas blancas, Ulurus multicolors como álbums insulars d'infanzia, con bientres de bida en cada roca, en cada arena, a cada inte; bientres de polideza semellans a peitos de lei. Pero tamién, ó sí, bida-muerte, coscaranas _cascas de bientres_ dixatas tal begada por tartugas marinas. Asinas doncas, unibersos bibiens sobre mars d'estrelas, gorgollos de plazer u de disipazión. Y una mesma, una mesma bida infinita".

Diz a canta: "L'alba crexién clama a Uluru. Os güellos de suenio claman a unos güellos azuls de Humboldt, a un bolar de paxaros amariellos _canarios salbaches y libres_, en goyosa multitú, sobre islas de Montaña Clara, Graciosa, Alegranza, tierra guanche. L'alba crexién ye a promesa d'Uluru: no bi ha gabias en a muerte y en a bida, en os zielos internos. No ye trista ista promesa: no son os mapas de losas, as lunas de paper, o puzzle que o zerebro no remata d'acotraziar, no ye a muga d'a estinzión, tan sólo ye a bida crexendo, tan sólo ye a muerte morindo, tan sólo a eboluzión d'o cosmos enta o gran corazón unibersal..."

Debanto a capeza d'o leito. Ó, sí, Uluru.

Chuan Chusé Bielsa