Azul y boiras

Dios, ¿por qué os millors se'n ban?
Os que sienten, os que beyen
O zielo con güellos masiau altos.
¿Por qué, tan lugo, los te'n lebas?
Os que dan, os que naxioron
Con un amor masiau intenso,
Os que merexeban, Dios,
Un paisache de sol relichioso, agora.

Caminan enta debán ombres
Que minchan ombres,
Caminan enta debán ombres
Pataquiando sangres.
Caminamos tamién nusatros
Enta boiradas.
Os millors te'n lebas,
Quiers con Tu l'azul d'a Tierra.

Y quedamos nusatros
Aquí, sin zielos, sin alturas,
Y quedamos nusatros,
Os que femos d'a bida una gran duda,
Anguniosa, sin fe.
¿Por qué os millors te'n lebas?

Cata la Tierra, tasta
Las suyas colors sin Dios.
Marchoron os azuls más claros.
Agora, a mirada ye una boira
De tristura, o zielo en alto
Ye nomás una pregunta.

Chuan Chusé Bielsa