Atras fuellas

A nuestra estió una infanzia
de machos por as carreras,
carreras sonoras de cascos,
carreras escuras de piedra.
As casas, en os patios,
oloraban a bino y a biellas.

A nuestra estió una infanzia
de falzes aspras, de tierra,
tierra amarilla en os faxos,
tierra calién en as eras.
As puertas d'os campos,
de tablas cremadas, ubiertas.

A nuestra estió una infanzia
de fogarils en penumbra,
penumbra en os muros de bardo,
penumbra en a nuestra cultura.
Mans crebazadas aparando
as zagueras, pobras purnas.

A nuestra estió una infanzia
sulcada de parolas propias.
Si as fuellas son breus suenios
radizes y brancas demoran.
Si bi ese rechitos, ninos nuebos,
un alba, un alba benirba pronta.

Chuan Chusé Bielsa